សម្តេចតេជោ ហ៊ុន សែន ប្រកាសដាក់ «កាតព្វកិច្ចវ៉ាក់សាំង» លើកងកម្លាំងប្រដាប់អាវុធ និងមន្ត្រីរាជការ លើកលែងតែប្រជាពលរដ្ឋដែលស្ថិតក្នុងគោលការណ៍ស្ម័គ្រចិត្ត

271

(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងនាមជាប្រមុខរាជរដ្ឋាភិបាល សម្តេចបានប្រកាសដាក់ចេញ «កាតព្វកិច្ចវ៉ាក់សាំង» លើកងកម្លាំងប្រដាប់អាវុធ និងមន្ត្រីរាជការស៉ីវិល លើកលែងតែប្រជាពលរដ្ឋ ដែលត្រូវស្ថិតនៅក្នុងគោលការណ៍ស្ម័គ្រចិត្ត ដើម្បីទទួលបានវ៉ាក់សាំងប្រឆាំងកូវីដ១៩។ ការប្រកាស់បែបនេះបានធ្វើឡើងក្នុងសន្និសីទសារព័ត៌មានមួយ នៅថ្ងៃទី១០ ខែមេសា ឆ្នាំ២០២១នេះ ។

សម្តេចតេជោ ហ៊ុន សែន មានប្រសាសន៍បញ្ជាក់យ៉ាងច្បាស់ដូច្នេះថា៖ «ក្នុងប៉ុន្មានថ្ងៃនេះ គេបានស្តីបន្ទោសខ្ញុំថា រំលោភលើគោលការណ៍ស្ម័គ្រចិត្ត (រឿងចាក់វ៉ាក់សាំងកូវីដ១៩) តែខ្ញុំសូមបញ្ជាក់ឲ្យច្បាស់ ក្នុងឋានៈជាប្រមុខនៃរាជរដ្ឋាភិបាលរបស់ប្រទេស។ ខ្ញុំត្រូវមានភារកិច្ច ដាក់ជាកាតព្វកិច្ច «វ៉ាក់សាំងកាត្វកិច្ច» ឲ្យកងកម្លាំងប្រដាប់អាវុធ និងមន្ត្រីរាជការស៉ីវិលទាំងអស់ តែសម្រាប់ប្រជាពលរដ្ឋ គឺគោលការណ៍ស្ម័គ្រចិត្ត»

សម្តេចតេជោនាយករដ្ឋមន្ត្រី ក៏មានប្រសាសន៍ថា«វ៉ាក់សាំងកាតព្វកិច្ច» គឺជាយុទ្ធសាស្ត្រដើរមុនសភាពការណ៍ ដោយសម្តេចព្យាករថា ទៅថ្ងៃមុនពិភពលោកទាំងអស់ នឹងដាក់ចេញគោលការណ៍កាតព្វកិច្ចវ៉ាក់សាំងនេះផងដែរ។ សម្តេចតេជោ បានថ្លែងថា ទៅថ្ងៃក្រោយអ្នកមិនចាក់វ៉ាក់សាំង នឹងមិនត្រូវគេអនុញ្ញាតឲ្យចូលប្រទេសគេនោះទេ ហើយសូម្បីតែនៅអឺរ៉ុប ក៏រៀបចំឲ្យមានលិខិតឆ្លងដែនសម្រាប់អ្នកចាក់វ៉ាក់សាំងកូវីដ១៩ដែរ។

សម្តេចប្រមុខដឹកនាំកំពូលរាជរដ្ឋាភិបាលកម្ពុជា បានថ្លែងថា ធ្វើមេដឹកនាំគ្រប់គ្រងប្រទេសត្រូវតែហ្មត់ចត់ បើមិនហ្មត់ចត់មិនអាចដឹកនាំបានទេ ហើយសូម្បីព្រះចៅអធិការវត្ត ក៏ត្រូវមានវិន័យដែរ។ សម្តេចតេជោ ហ៊ុន សែន បានឲ្យក្រុមអ្នកសិទ្ធិមនុស្សពិចារណា រវាងការដាក់ចេញវិធានការការពារជីវិតមនុស្ស និងទុកឲ្យមនុស្សស្លាប់ដោយជំងឺកូវីដ១៩ តើយកមួយណា? សម្តេចបន្តថា គេចង់ថាសម្តេចផ្តាច់ការ ឬរំលោភសិទ្ធិមនុស្សក៏ថាទៅ តែសំខាន់សម្តេចការពារអាយុជីវិតពលរដ្ឋមួយប្រទេស។

ក្នុងសន្និសីទនេះ សម្តេចតេជោ ហ៊ុន សែន ថែមទាំងបានច្រានចោលចំពោះមតិអកុសលពីក្រុមប្រឆាំងរាជរដ្ឋាភិបាល រឿងសម្តេចរៀបចំឲ្យមានប៉ាឆា (ឈានបដ្ឋាន) គឺជាការប្រមាថជីវិតប្រជាជន ប៉ុន្តែសម្តេចថានោះជាការដើរមុនសភាពការណ៍ផងដែរ ព្រោះបើមិនរៀបចំបែបនេះទេ តើនឹងមានអ្វីកើតឡើង ខណៈកម្ពុជាកំពុងជួបករណីឆ្លងកូវីដ១៩ ព្រឹត្តិការណ៍សហគមន៍ ២០កុម្ភៈ យ៉ាងធ្ងន់ធ្ងរ។ សម្តេចលើកឡើងទៀតថា ការដើរមុនភាពការណ៍បែបនេះ ធ្វើឲ្យសម្តេចឈ្នះក្រុមប្រឆាំងរហូតមក ហើយនឹងបន្តឈ្នះជារៀងដរាប។

សម្តេចបញ្ជាក់ថា «ត្រូវចាំ! ដោយសារ ហ៊ុន សែន ដើរមុនសភាពការណ៍ដូច្នេះ បានជា ហ៊ុន សែន ឈ្នះមុនលោកឯង ជារៀងរហូត ហើយក៏នៅតែឈ្នះលោកឯងជារឿងរហូត ទៅដែរ។ បើលោកឯង គិតតែពីដើរព្យាបាទ ឯខ្ញុំគ្រប់គ្រងសភាពការណ៍មុនមួយជំហាន បើទោះបីជាវាមិនបានល្អឥតខ្ញុំ តែខ្ញុំក៏បានកាត់បន្ថយនូវហានីភ័យ»

ពាក់ព័ន្ធនឹងរឿងវ៉ាក់សាំងប្រឆាំងកូវីដ១៩ សម្តេចតេជោ ហ៊ុន សែន បានថ្លែងថា នៅឆ្នាំ២០២១នេះ វ៉ាក់សាំងជាង ១១លានដូស នឹងមកដល់ប្រទេសកម្ពុជា បើមិនមានអ្វីប្រែប្រួលទេនោះ។ សម្តេចតេជោ ហ៊ុន សែន បានថ្លែងថា វ៉ាក់សាំង ៥០ម៉ឺនដូស មកដល់ខែមេសា, ១លាន ៥សែនដូស មកដល់ខែឧសភា, ៣លានដូស មកដល់ខែមិថុនា, ២លានដូស មកដល់ខែកក្កដា និង ១លានដូស មកដល់ខែសីហា។

Turbo tech solutions
HQP