កីឡា៖ ក្រុមបាល់ទាត់ជម្រើសជាតិយុវជនអាយុក្រោម ១៩ឆ្នាំកម្ពុជាបានទទួល ៣ពិន្ទុពេញពីការប្រកួតបើកឆាកពានរង្វាន់ជើងឯកយុវជនអាស៊ីអាគ្នេយ៍អាយុក្រោម ១៩ឆ្នាំ AFF U19 Boys Championship 2022 បន្ទាប់ពីយកឈ្នះក្រុមសិង្ហបុរីដោយលទ្ធផល ១-០ កាលពីរាត្រីថ្ងៃទី០៣ ខែកក្កដា ឆ្នាំ២០២២ នៅប្រទេសឥណ្ឌូនេស៊ី។
ជំនួបបើកឆាកពូល B នេះ ក្រុមជម្រើសជាតិ U19 កម្ពុជាបានរកគ្រាប់បាល់នាំមុខមុននៅនាទីទី៧ ដែលធ្វើសម្រេចដោយសមាជិកក្រុមអង្គរថាយហ្គឺរកីឡាករ សុវណ្ណ ដូណា ហើយលទ្ធផលនេះក៏បានរក្សារហូតដល់ចប់ការប្រកួតតែម្ដង។ នេះគឺជាការសងសឹងបានវិញសម្រាប់ក្រុមគោព្រៃជំទង់កម្ពុជា ដ្បិតកាលពីឆ្នាំ២០១៩ នៅប្រទេសវៀតណាម កម្ពុជាបានចាញ់សិង្ហបុរី ១-០ ដូចគ្នា។
ជ័យជម្នះនេះបានធ្វើឲ្យក្រុមយុវជន U19 កម្ពុជាមាន ៣ពិន្ទុស្មើគ្នាជាមួយក្រុម U19 ឡាវដែលបានយកឈ្នះក្រុមយុវជនទីម័រខាងកើត ២-០ កាលពីម្សិលមិញ។ សម្រាប់ប្រកួតបន្ទាប់ក្រុមគោព្រៃជំទង់កម្ពុជានឹងត្រូវជួបក្រុម U19 ម៉ាឡេស៊ីនាវេលាម៉ោង ៣រសៀលថ្ងៃទី០៥ ខែកក្កដាស្អែកនេះនៅលើទឹកដីឥណ្ឌូនេស៊ីដដែល៕
