ភ្នំពេញ ៖ គិតត្រឹមព្រឹកថ្ងៃទី៣ ខែសីហានេះ ក្រុមអត្តពលិកជនពិការកម្ពុជា ឈ្នះបានមេដាយចំនួន ១៣ គ្រឿង ហើយដោយទទួលបានមេដាយមាស ៣ គ្រឿង ប្រាក់ ៦ គ្រឿង និងសំរឹទ្ធ ៤ គ្រឿង ក្នុងការប្រកួតអាស៊ានប៉ារ៉ាហ្គេម លើកទី១១ ឆ្នាំ២០២២ នៅប្រទេសឥណ្ឌូណេស៊ី។
ដោយឡែក នៅព្រឹកថ្ងៃទី៣ ខែសីហា នេះ ក្រុមកីឡាការិនីបាល់ទះ អង្គុយជនពិការកម្ពុជា ត្រូវប្រកួតជាមួយក្រុមម្ចាស់ផ្ទះឥណ្ឌូណេស៊ី ក្នុងវគ្គសន្សំពិន្ទុ នៅក្នុងព្រឹត្តិការណ៍អាស៊ាន ប៉ារ៉ាហ្គេម លើកទី១១ ឆ្នាំ២០២២ នេះ ជាបន្តទៀត ។
សម្រាប់វិញ្ញាសាបាល់ទះអង្គុយជនពិការ ផ្នែកនារីនេះ មានតែ ៣ ប្រទេសប៉ុណ្ណោះ ដែលបានបញ្ជូនមកចូលរួមប្រកួត អាស៊ានប៉ារ៉ាហ្គេម លើកទី១១ ឆ្នាំ២០២២ នេះ គឺម្ចាស់ផ្ទះឥណ្ឌូណេស៊ី ថៃ និង កម្ពុជា។ រីឯរូបមន្តនៃការប្រកួត ក្រុមនីមួយៗ ត្រូវប៉ះគ្នាពីរដង ក្នុងវគ្គសន្សំពិន្ទុ មុនពេលប្រកួតវគ្គ ផ្តាច់ព្រ័ត្រ។
ក្រុមកីឡាការិនីបាល់ទះអង្គុយជនពិការកម្ពុជា នៅមិនទាន់អស់ឱកាសឡើង ទៅវគ្គផ្តាច់ព្រ័ត្រឡើយ បើទោះបីបានចាញ់ ២ ប្រកួតជាប់គ្នា គឺចាញ់ម្ចាស់ផ្ទះឥណ្ឌូណេស៊ី ០-៣ (៨-២៥, ៨-២៥, ៦-២៥) និងចាញ់ក្រុមនារីថៃ ០-៣ (១២-២៥, ១៥-២៥, ១៥-២៥) វគ្គសន្សំពិន្ទុ។ ថ្ងៃទី៣ សីហា វេលាម៉ោង ១១ ព្រឹកនេះ ក្រុមនារីកម្ពុជា ត្រូវប្រកួតជាមួយក្រុមនារី ឥណ្ឌូណេស៊ី ជាលើកទី២ ។
ទោះបីជាយ៉ាងណា តាមពិន្ទុបណ្តោះអាសន្ន ម្ចាស់ផ្ទះឥណ្ឌូណេស៊ី ស្ថិតនៅលេខ១ ថៃលេខ២ និងកម្ពុជាលេខ៣។ តាមរូបមន្តប្រកួត បន្ទាប់ពីចប់វគ្គសន្សំពិន្ទុ ក្រុមលេខ១ ប្រកួតជាមួយក្រុមលេខ២ ដើម្បីដណ្តើមមេដាយមាស ខណៈក្រុមលេខ៣ ទទួលបានមេដាយសំរឹទ្ធ។
សូមបញ្ជាក់ថា គិតត្រឹមព្រឹកថ្ងៃទី៣ ខែសីហានេះ ក្រុមអត្តពលិកជនពិការកម្ពុជា ឈ្នះបានមេដាយចំនួន ១៣ គ្រឿង ហើយ គឺមាស ៣ ប្រាក់ ៦ និងសំរឹទ្ធ ៤ ក្នុងការប្រកួតអាស៊ានប៉ារ៉ាហ្គេម លើកទី១១ ឆ្នាំ២០២២ នៅប្រទេសឥណ្ឌូណេស៊ី៕
