កំពង់ផែទេសចរណ៍ខេត្តកំពត តម្លៃជិត២០លានដុល្លារអាមេរិក បានបញ្ចប់ការសាងសង់ជាស្ថាពរហើយ

85

កំពត៖ កំពង់ផែទេសចរណ៍ខេត្តកំពត ដែលនឹងដើរតួនាទីសំខាន់សម្រាប់តភ្ជាប់ដំណើរទេសចរណ៍តាមសមុទ្រនៅកម្ពុជា និងប្រទេសជិតខាងកម្ពុជាផងនោះ បានសាងសង់បញ្ចប់ជាស្ថាពរហើយ។

កំពង់ផែបម្រើផ្នែកទេសចរណ៍ដ៏ធំនៅក្នុងខេត្តកំពតនេះ ស្ថិតនៅជាប់នឹងដងព្រែកដែលជាដៃសមុទ្រ ស្ថិតក្នុងស្រុគទឹកឈូ ចម្ងាយប្រមាណ៦គីឡូម៉ែត្រ ពីក្រុងកំពត។ កំពង់ផែទេសចរណ៍សមុទ្រនេះ សាងសង់ឡើងលើដីទំហំជាង ៤០០ហិកតា ត្រូវបានចាប់ផ្តើមសាងសង់កាលពីឆ្នាំ២០១៨ ហើយបញ្ចប់ការសាងសង់ទាំងស្រុងនៅថ្ងៃខែមិថុនា ឆ្នាំ២០២២។

មានហេដ្ឋារចនាសម្ព័ន្ធចាំបាច់ជាច្រើនត្រូវបានសាងសង់ឡើង ដើម្បីបម្រើដល់ការចូលចតរបស់នាវាទេសចរណ៍ និងអគារសម្រាប់អ្នកទេសចរណ៍ឈប់សំចតផងដែរ។ របាយការណ៍បានឱ្យដឹងថា ហេដ្ឋរចនាសម្ព័ន្ធដែលត្រូវសាងសង់រួមមាន៖ កំពង់ផែប្រវែងជាង ១២៣ម៉ែត្រ មានទទឹងជាង ១១ម៉ែត្រ, អគារអ្នកដំណើរ និងភោជនីយដ្ឋាន, ផ្លូវ, អគារប្រមូលសំរាម, អគារបច្ចេកទេស, បន្ទប់ទឹកសាធារណៈ, អាងស្តុកទឹក, ស្រះទឹក និងប្រព័ន្ធហេដ្ឋារចនាសម្ព័ន្ធមួយចំនួនទៀត។

កំពង់ផែទេសចរណ៍ខេត្តកំពត ត្រូវបានសាងសង់ឡើងក្រោមកម្ចីថវិការបស់ធនាគារអភិវឌ្ឍន៍អាស៊ី ADB ជាង ១៨លានដុល្លារអាមេរិក។ ដំណើរការសាងសង់ដោយក្រសួងសាធារណការ និងដឹកជញ្ជូន។

បន្ទាប់ពីការសាងសង់រួចរាល់នៅថ្ងៃទី០៧ ខែតុលា ឆ្នាំ២០២២ លោកឧបនាយករដ្ឋមន្ត្រី អូន ព័ន្ធមុនីរ័ត្ន អមដំណើរដោយលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងលោក ថោង ខុន រដ្ឋមន្ត្រីក្រសួងទេសចរណ៍ បានចុះទៅពិនិត្យដោយផ្ទាល់ និងពិភាក្សាលើការងារមួយចំនួន ដើម្បីដាក់ឱ្យដំណើរការកំពង់ផែនេះ។

លោកឧបនាយករដ្ឋមន្ត្រី អូន ព័ន្ធមុនី បានលើកឡើងជាគំនិតមួយចំនួនពាក់ព័ន្ធការគ្រប់គ្រង ការដាក់ឱ្យដំណើរការ និងផ្តល់សេវាផ្សេងៗសម្រាប់បម្រើវិស័យទេសចរណ៍។

បើតាមបទបង្ហាញរបស់មន្ត្រីបច្ចេកទេស បានលើកឡើងឧបសគ្គមួយចំនួននៅកំពង់ផែននេះពាក់ព័ន្ធការចូលចិត្តរបស់នាវាអ្នកទេសចរណ៍។ បច្ចុប្បន្នអាចអនុញ្ញាតឱ្យចូលចតបានត្រឹមនាវាខ្នាតតូច ដែលផ្ទុកអ្នកដំណើរត្រឹម៣០០នាក់ ទៅ៤០០នាក់ប៉ុណ្ណោះ។ ដើម្បីឱ្យអ្នកនាវាដឹកអ្នកទេសចរធំៗចូលចតបាន ទាមទារឱ្យមានការស្តារគន្លងនាវាឱ្យជ្រៅបន្ថែមទៀត។

សូមបញ្ជាក់ថា កំពង់ផែទេសចរណ៍ខេត្តកំពត អាចភ្ជាប់ទៅនឹងកំពង់ផែក្នុងខេត្តព្រះសីហនុ ខេត្តកោះកុង កោះរ៉ុង ហើយក៏ភ្ជាប់ទៅកំពង់ផែកោះត្រល់ និងកំពង់ដទៃទៀតនៅប្រទេសវៀតណាម និងប្រទេសថៃផងដែរ។

ធ្លាប់មានការបង្ហាញក្តីរំពឹងថា កំពង់ផែទេសចរណ៍នេះ នឹងក្លាយជាចលករមួយបន្ថែមទៀតសម្រាប់ស្រូបទាញអ្នកទេសចរណ៍តាមផ្លូវសមុទ្រចូលមកកម្ពុជា។ តែសម្រាប់អ្នកជំនាញទេសចរណ៍ បានលើកឡើងថា ការមានកំពង់ផែទេសចរណ៍ហើយនោះ គឺទាមទារឱ្យមានគោលនយោបាយ និងកិច្ចសហប្រតិបត្តិការដ៏ប្រសើរមួយបន្ថែមទៀត រវាងកម្ពុជា និងប្រទេសជិតខាង ដើម្បីទាក់ទាញអ្នកទេសចរចូលមកកំពង់ផែមួយនេះ។ អ្វីដែលសំខាន់ទៀតនោះ ការបង្កើតនូវផលិតផលទេសចរណ៍ក្នុងខេត្តកំពត។ តើខេត្តកំពតមានផលិតផលទេសចរណ៍អ្វីខ្លះ សម្រាប់ទាក់ទាញអ្នកទេសចរណ៍?

Turbo tech solutions
HQP