នំពេញ៖ សម្តេចតេជោ នាយករដ្ឋមន្ត្រី ហ៊ុន សែន បានចេញអនុក្រឹត្យ ដាច់ដោយឡែកពីគ្នា យ៉ាងហោចណាស់ ៤ នៅថ្ងៃទី២៣ ខែធ្នូ ឆ្នាំ២០២២ នេះ ដោយបានសម្រេចបង្កើតក្រុងថ្មី ២ទៀត នៅខេត្តកណ្តាល គឺ «ក្រុងអរិយក្សត្រ» និង «ក្រុងសំពៅពូន»។ ក្នុងនោះ ក៏មានបង្កើតក្រុងថ្មី១ និងស្រុកថ្មី១ នៅខេត្តកំពង់ស្ពឺ ដោយបំបែកស្រុកឧដុង្គ ជា ២ គឺ «ក្រុងឧដុង្គម៉ែជ័យ» និង«ស្រុកសាមគ្គីមុនីជ័យ»។ ក្រៅពីនោះ រាជរដ្ឋាភិបាល ក៏បានបង្កើតស្រុកថ្មីមួយទៀត នៅខេត្តក្រចេះ គឺ «ស្រុកអូរគ្រៀងសែនជ័យ»។
អនុក្រឹត្យ ចុះថ្ងៃទី២៣ ខែធ្នូ ឆ្នាំ២០២២ បានសម្រេចបង្កើត «ក្រុងអរិយក្សត្រ» ក្នុងខេត្តកណ្តាល ដោយកាត់យកឃុំ ៦ ពីស្រុកខ្សាច់កណ្តាល គឺឃុំបាក់ដាវ ឃុំកោះឧកញ៉ាតី ឃុំព្រែកអំពិល ឃុំព្រែកលួង ឃុំព្រែកតាកូវ និងឃុំស្វាយជ្រុំ ព្រមទាំងកាត់ឃុំ ចំនួន ៥ ពីស្រុកល្វាឯម គឺឃុំអរិយក្សត្រ ឃុំសារិកាកែវ ឃុំពាមឧកញ៉ាអុង ឃុំព្រែកក្មេង និងឃុំបារុង។
អនុក្រឹត្យ ចុះថ្ងៃទី២៣ ខែធ្នូ ឆ្នាំ២០២២ បានសម្រេចបង្កើត «ក្រុងសំពៅពូន» នៃខេត្តកណ្តាល ដោយកាត់យកឃុំចំនួន ៥ ពីស្រុកកោះធំ គឺឃុំឈើខ្មៅ ឃុំព្រែកជ្រៃ ឃុំព្រែកស្ពឺ ឃុំជ្រោយតាកែវ និងឃុំសំពៅពូន។
ចំណែក «ស្រុកអូរគ្រៀងសែនជ័យ» នៃខេត្តក្រចេះ ដែលទើបបង្កើតថ្មី ត្រូវកាត់យក ៥ឃុំ ពីស្រុកសំបូរ គឺឃុំក្បាលដំរី ឃុំអូរគ្រៀង ឃុំអូរកណ្តៀរសែនជ័យ ឃុំរលួសមានជ័យ និងឃុំស្រែជិះ។
តាមអនុក្រឹត្យដាច់ដោយឡែកមួយទៀត រាជរដ្ឋាភិបាល ក៏បានសម្រេចបំបែកស្រុកឧដុង្គ ជា២ គឺ «ក្រុងឧដុង្គម៉ែជ័យ» ដោយកាត់យកឃុំចំនួន ៥ គឺឃុំវាំងចាស់ ឃុំវាលពង់ ឃុំត្រាចទង ឃុំព្រះស្រែ និងឃុំក្សេមក្សាន្ត ពីស្រុកឧដុង្គ ខេត្តកំពង់ស្ពឺ។ រីឯ «ស្រុកសាមគ្គីមុនីជ័យ» កាត់យកឃុំ ចំនួន ១០ ពីស្រុកឧដុង្គ ខេត្តកំពង់ស្ពឺ គឺឃុំចាស់សែន ឃុំជើងរាស់ ឃុំជំពូព្រឹក្ស ឃុំក្រាំងចេក ឃុំមានជ័យ ឃុំព្រៃក្រសាំង ឃុំយុទ្ធសាមគ្គី ឃុំដំណាក់រាំង ឃុំពាំងល្វា និងឃុំភ្នំតូច។
ដូច្នេះជាសរុប នៅថ្ងៃទី២៣ ខែធ្នូ ឆ្នាំ២០២២ យ៉ាងហោចណាស់ សម្តេចតេជោ ហ៊ុន សែន បានចេញអនុក្រឹត្យ ៤ ដាច់ដោយឡែកពីគ្នា។ អនុក្រឹត្យទី១-បង្កើត «ក្រុងអរិយក្សត្រ»។ ចំណែកអនុក្រឹត្យទី២ បង្កើត «ក្រុងសំពៅពូន» ក្នុងខេត្តកណ្តាល។ អនុក្រឹត្យទី៣ បង្កើតស្រុកថ្មីមួយទៀត នៅខេត្តក្រចេះ គឺ «ស្រុកអូរគ្រៀងសែនជ័យ»។ អនុក្រឹត្យទី៤ បំបែកស្រុកឧដុង្គ ក្នុងខេត្តកំពង់ស្ពឺ ជាពីរ គឺ«ក្រុងឧដុង្គម៉ែជ័យ» និង«ស្រុកសាមគ្គីមុនីជ័យ»។
ការបង្កើតក្រុងថ្មី និងបង្កើតស្រុកថ្មី នាពេលនេះ ត្រូវបានធ្វើឡើង នៅមុនការបោះឆ្នោតជ្រើសរើសក្រុមប្រឹក្សារាជធានីខេត្ត និងក្រុមប្រឹក្សាក្រុងស្រុកខណ្ឌ អាណត្តិទី៤ ដែលនឹងត្រូវធ្វើឡើង នៅខែឧសភា ឆ្នាំ២០២៤។ ការបោះឆ្នោតនេះ ធ្វើឡើងអសកល ដោយមានតែអ្នកតំណាងរាស្ត្រ និងក្រុមប្រឹក្សាឃុំសង្កាត់ ក្នុងតំណែងប៉ុណ្ណោះ ជាអ្នកបោះឆ្នោត៕