កំពង់ចាម៖ អណ្ដាតភ្លើងឆេះចេញពីលំនៅឋានសាងសង់អំពីឈើមួយកន្លែង ដោយមានផ្សែងហុយខ្មួលខ្មាញ់ទៅលើអាកាស ។ ហេតុការណ៍នេះបានកើតឡើងនៅវេលាម៉ោង១និង២០នាទីរសៀលថ្ងៃទី៧ ឧសភា ឆ្នាំ២០២៣ ស្ថិតនៅចំណុចភូមិថ្លុកជ្រៅ ឃុំខ្ចៅ ស្រុកកងមាស ភ្លាមៗនោះត្រូវបានសមត្ថកិច្ចមូលដ្ឋាន រួមទាំងអាជ្ញាធរបានសុំអន្តរាគមន៍រថយន្តពន្លត់អគ្គិភ័យនៃអធិការដ្ឋាននគរបាលស្រុកកងមាស១គ្រឿងចេញមកអន្តរាគមន៍មុនគេ ។
លោកភោគ សាវុធ អភិបាលស្រុកកងមាសប្រាប់ឲ្យដឹងថា ដំបូងកូនប្រុសម្ចាស់ផ្ទះ បានប្រមូលសំលៀកបំពាក់ទៅដុតនៅចង្ក្រានបាយភ្លើងក៏បានឆាបឆេះខ្លាំង ដោយខ្លាចរលាកក៏ប្រញាប់ប្រញាល់រត់ចុះមកដី ។ ភ្លាមៗនោះ អ្នកជិតខាងឃើញក៏បានរាយការណ៍បន្ទាន់ មកសមត្ថកិច្ចនៅមូលដ្ឋាន និងរាយការណ៍បន្តទៅលោកអធិការនគរបាលស្រុកកងមាសដើម្បីឲ្យរថយន្តពន្លត់អគ្គិភ័យដែលប្រចាំការ២៤ម៉ោងលើ២៤ម៉ោងចេញមកអន្តរាគមន៍បាញ់ទឹកពន្លត់ ។
លោកបានបន្តទៀតថា កម្លាំងប៉ុស្តិ៍នគរបាលរដ្ឋបាលខ្ចៅ ចុះជួយពន្លត់ម្ចាស់ផ្ទះឈ្មោះស៊ុ អេងរ៉ុង ភេទប្រុស អាយុ៥៧ឆ្នាំ រស់នៅភូមិឃុំខាងលើ ។ ករណីនេះមិនបណ្តាលអោយប៉ះពាល់អាយុជីវិតប្រជាពលរដ្ឋទេ។ ការខូចខាតផ្ទះសង់អំពីឈើ ដំបូលប្រក់ក្បឿង ទំហំ(៨មែត្រ ×៩ម៉ែត្រ)ឆេះអស់ទាំងស្រុងចំពោះការខូចខាតបាត់បង់មាសជាង១តម្លឹង, ស្រូវ២០បេ,ប្រាក់ចំនួន២លានរៀល និងទ្រព្យសម្បត្តិប្រើប្រាស់មួយចំនួន,ចំណែកមាសកំពុងស្វែងរក ។
បើតាមការបំភ្លឺផ្ទាល់មាត់ពីឈ្មោះ ញាន អ៊ូ ភេទ ប្រុស អាយុប្រហែល២៨ឆ្នាំ ថាខ្លួនប្រមូលខោអាវចាស់ៗដុតនៅចង្គ្រានលើផ្ទះ ពេលភ្លើងឆេះខ្លាំងខ្លួនភ័យរត់ចុះមកក្រោមបណ្តាលអោយឆេះតែម្តង។ មូលហេតុដែលកូនប្រុសម្ចាស់ផ្ទះប្រមូលខោអាវដុតចោលដោយសារតែមានសតិមិនគ្រប់ ពេលដែលភ្លើងកំពុងតែឆេះខ្លាំងនោះ ម្ដាយបានចេញទៅលេងផ្ទះបងប្អូននៅជិតខាង ។ មិនទាន់បានប៉ុន្មានផង រថយន្តពន្លត់អគ្គិភ័យនៃអធិការដ្ឋាននគរបាលស្រុកកងមាសមួយគ្រឿងចេញមកអន្តរាគមន៍បាញ់ទឹកទន្លត់មុនគេ។
បន្ទាប់មក ក៏មានរថយន្តពន្លត់អគ្គិភ័យនៃអធិការដ្ឋាននគរបាលស្រុកព្រៃឈរ និងចុងក្រោយរថយន្តពន្លត់អគ្គិភ័យស្នងការដ្ឋាននគរបាលខេត្តមួយគ្រឿងសរុបចំនួន៣គ្រឿងបានបាញ់ទឹកអស់៣គ្រឿង ធ្វើឱ្យភ្លើងរលត់ទៅវិញទាំងស្រុង ដោយមិនបានឆេះរាលដាលដល់ផ្ទះអ្នកជិតខាងនោះ
ទេ។
នៅព្រឹកថ្ងៃទី៨ ឧសភា នេះ លោកជាអភិបាលស្រុកកងមាស រួមនឹងអនុសាខាកាកបាទក្រហម នាំយកអំណោយទៅជូនដល់ម្ចាស់ផ្ទះរងគ្រោះដោយអគ្គិយនេះ។ ជាមួយនោះ ក្នុងរដូវក្តៅ អាជ្ញាធរសូមអំពាវនាវឲ្យបងប្អូនប្រជាពលរដ្ឋបង្កើនការយកចិត្តទុកដាក់ប្រុងប្រយ័ត្ន មុនចេញពីផ្ទះត្រូវបិទបារែតភ្លើងពន្លត់ភ្លើងចង្ក្រានឲ្យអស់ដើម្បីកុំឲ្យមានគ្រោះអគ្គិភ័យកើតឡើងជាយថាហេតុ ។
