ភ្នំពេញ៖ អគ្គិភ័យមួយបានឆាបឆេះ និងរាលដាលផ្ទះស្តុកអីវ៉ាន់ (កំរាលពូកខ្នេីយ) ចំនួន ២ខ្នង យ៉ាងសន្ធោសន្ធៅ ព្រមទាំងសម្ភារៈមួយចំនួនធំ ត្រូវបានរងការខូចខាតនាវេលាម៉ោង ២០និង៣០នាទីយប់ ថ្ងៃទី០៧ ខែឧសភា ឆ្នាំ២០២៣ នៅចំណុចផ្ទះលេខ៤៨ នឹង ផ្ទះលេខ៥០ តាមបណ្តោយផ្លូវលេខ២០២ ភូមិ៦ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ ។
តាមប្រភពបានឲ្យដឹងថានៅមុនពេលកើតហេតុគឺផ្ទះខាងលើ មានផ្សែងហុយលាយឡំជាមួយអណ្តាតភ្លើងឆាបឆេះយ៉ាងសន្ធោសន្ធៅ ហើយពេលនោះភ្លើងឆេះលឿនបានរាលដាលឆេះផ្ទះមួយខ្នងទៀត ភ្លាមនោះក៏មានរថយន្តពន្លត់អគ្គិភ័យជាច្រើនគ្រឿង បានមកដល់កន្លែងកើតហេតុ ដើម្បីជួយអន្តរាគមន៍បាញ់ទឹកពន្លត់។ តែដោយស្ថានភាពភ្លើងឆេះលឿន ថែមទាំងមានខ្យល់បោកបក់ ដែលជាហេតុធ្វើឲ្យភ្លើងឆាបឆេះផ្ទះចំនួន ០២ខ្នង រងការខូចខាតស្ទើរតែស្រុង រួមទាំងខូចខាតសម្ភារៈ (កំរាលពូកខ្នេីយ) ខូចខាតមួយចំនួនធំ។
នៅក្នុងហេតុការណ៍នេះ គឺមានរថយន្តពន្លត់អគ្គិភ័យភ័យចំនួន ៣២គ្រឿង បានចុះមកជួយអន្តរាគមន៍បាញ់ទឹកពន្លត់ ដោយក្នុងនោះមានរថយន្ត អគ្គិភ័យរបស់ការិយាល័យ បង្ការពន្លត់អគ្គិភ័យ និង សង្គ្រោះ ចំនួន ២២គ្រឿង ,រថយន្តកងរាជអាវុធហត្ថចំនួន ០២គ្រឿង, រថយន្តក្រុមហ៊ុនស្រាបៀរកម្ពុជាចំនួន ០១គ្រឿង ,រថយន្តទីក្រុងជ្រោយចង្វារចំនួន ០៥គ្រឿង, រថយន្តទីក្រុងអូឡាំព្យាចំនួន ០២គ្រឿង ទើបអាចគ្រប់គ្រងស្ថានការ និង បាញ់ទឹករលត់ជាស្ថាពរ និង មិនឲ្យរាលដាល ដល់ផ្ទះប្រជាពលរដ្ឋផ្សេងទៀត៕
