ពោធិ៍សាត់៖ បុរសម្នាក់ត្រូវសមត្ថកិច្ចចាប់ខ្លួន ក្រោយពីដើរបោកប្រាស់ប្រជាពលរដ្ឋជាច្រើននាក់ ហើយយកអស់លុយរាប់សិបម៉ឺនដុល្លារនៅក្នុងមូលដ្ឋានស្រុកវាលវែង ដោយគ្រាន់តែមានក្រដាសតែងតាំងមួយសន្លឹក ជាប្រធានប្រតិបត្តិអនុសាខាសមាគមសម្ព័ន្ធប្រជាជនដើម្បីសន្តិភាព។ ការចាប់ខ្លួនជនឆបោករូបនេះ ធ្វើឡើងនៅវេលាម៉ោង៧និង១២នាទីយប់ ថ្ងៃទី៧ ខែឧសភា ឆ្នាំ២០២៣ ស្ថិតក្នុងស្រុកវាលវែង ខេត្តពោធិ៍សាត់។
បើតាមលោក ធាង ឡេង អធិការនគរបាលស្រុកវាលវែង បានប្រាប់ឲ្យដឹងថា ជនសង្ស័យខាងលើនេះមានឈ្មោះ ឃឹម សុភ័ណ្ឌ អាយុ៥៩ឆ្នាំ មុខរបរមិនពិតប្រាកដ រស់នៅក្នុងភូមិចំការជ្រៃខាងជើង ឃុំអន្លង់រាប ស្រុកវាលវែង ខេត្តពោធិ៍សាត់។
លោកបញ្ជាក់ថា ជនសង្ស័យរូបនេះបានដើរធ្វើសកម្មភាពឆបោកបងប្អូនប្រជាពលរដ្ឋនៅក្នុងមូលដ្ឋានស្រុកវាលវែង អស់ជាច្រើននាក់ ដោយម្នាក់ៗយកអស់ប្រាក់ចាប់ពី៤០០០ដុល្លារឡើងទៅ និងលុយខ្មែរ អ្នកខ្លះអស់មួយលានរៀល ឬ២៤លានរៀល ជាថ្នូរនឹងការរត់ការចូលជាអតីតយុទ្ធជនដើម្បីទទួលបានប្រាក់បៀវត្ស។
លោកបានបន្តទៀតថា នេះគ្រាន់តែប្រជាពលរដ្ឋដាក់ពាក្យបណ្ដឹងដល់សមត្ថកិច្ចតែប៉ុណ្ណោះ ហើយនៅមានប្រជាពលរដ្ឋជាច្រើននាក់ផ្សេងទៀត ក៏រងគ្រោះដោយសារជនឆបោកខាងលើនេះផងដែរ តាមរយៈការបញ្ចុះបញ្ចូលឱ្យចូលជាអតីតយុទ្ធជន ដោយសំអាងលើឯកសារមួយសន្លឹក ដែលមានខ្លឹមសារជាសមាគមសម្ព័ន្ធប្រជាជនដើម្បីសន្តិភាព ដែលតែងតាំងជននេះជាប្រធានប្រតិបត្តិអនុសាខាសមាគមផង និងតាមរយៈសកម្មភាពការងារជាមួយអាជ្ញាធរ ក្រុមការងារនៅក្នុងមូលដ្ឋានផង ដើម្បីបង្ហាញឱ្យពលរដ្ឋឃើញមានទំនុកចិត្តដាក់ទុនជាមួយតែម្ដង។
សូមបញ្ជាក់ផងដែរថា នេះជាករណីថ្មីមួយទៀតនៅក្នុងស្រុកវាលវែង ដែលសមត្ថកិច្ចចាប់ខ្លួនជនឆបោកចាត់ការតាមនីតិវិធីច្បាប់ ក្រោយពីបែកធ្លាយដឹងដល់ថ្នាក់ដឹកនាំខេត្ត និងមានបញ្ជាពីលោក ស ថេង ស្នងការនគរបាលខេត្ត ឯកឧត្តម កូយ កាន់យ៉ា ព្រះរាជអាជ្ញាអមសាលាដំបូងខេត្ត រហូតដល់ឯកឧត្តមទេសរដ្ឋមន្ត្រី គន់ គីម ឱ្យកម្លាំងសមត្ថកិច្ចស៊ើបអង្កេតស្រាវជ្រាវ រហូតឈានដល់ចាប់ខ្លួនជនឆបោកខាងលើ យកមកចាត់ការតាមច្បាប់តែម្ដង៕
