ភ្នំពេញ ៖ អាជីវករលក់មាសពេជ្រ នៅផ្សារស្ទឹងមានជ័យចាស់ ត្រូវបានក្រុមចោរមួយក្រុមប្រដាប់ដោយអាវុធភ្ជង់ប្លន់ យកទ្រព្យសម្បត្តិបានសម្រេចអស់ជាង២០ម៉ឺនដុល្លារ ខណៈដែលជីវកររងគ្រោះទើបនឹងធ្វើដំណើរចេញពីផ្ទះទៅប្រកបមុខរបរ ។
ហេតុការណ៏ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង៧ព្រឹកថ្ងៃទី១៨ ខែឧសភា ឆ្នាំ ២០២៣ នៅចំណុចខាងក្រោយផ្សារស្ទឹងមានជ័យចាស់ ស្ថិតក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។
ជនរងគ្រោះបានប្រាប់អោយដឹងថា នៅមុនពេលកើតហេតុ គាត់បានយកគ្រឿងអលង្ការ មានប្លាកទីនទឹក៧ ប្លាកទីនទឹក៦ និងគ្រឿងអលង្ការផ្សេងៗទៀត និងមានលុយខ្មែរ លុយដុល្លារ ដាក់ក្នុងកាបូបស្ពាយ ដើម្បីយកទៅលក់នៅក្នុងផ្សារស្ទឹងមានជ័យចាស់ ដូចសព្វដង ក៏ប៉ុន្តែនៅពេលដែលគាត់កំពុងស្ពាយកាបូបដើរទៅផ្សារ ភ្លាមៗនោះក៏ស្រាប់តែ មានជនសង្ស័យជិះម៉ូតូ២គ្រឿង មានគ្នា៤នាក់ បានដកកាំភ្លើងភ្ជង់ប្លន់ និងបានវាយទៅលើអ្នកចូលទៅជួយ បណ្តាលអោយបែកក្បាលហូរឈាមជោក ភ្លាមៗនោះក្រុមចោរប្លន់ប្រដាប់អាវុធ បានរត់គេចស្រមោល ។
ក្រោយពេលកើតហេតុ សមត្ថកិច្ចបានចុះមកដល់ទីតាំងខាងលើ និងបន្តសាកសួរជនរងគ្រោះបន្ថែម និងបន្តស្រាវជ្រាវ ដើម្បីកំណត់មុខសញ្ញាតាមចាប់យកមកផ្តន្ទាទោសអោយទាល់តែបាន ។
