ក្រុមកុបករបារាំងបានបើករថយន្តចូលទៅក្នុងផ្ទះរបស់អភិបាលក្រុងមួយ នៅជាយរដ្ឋធានីប៉ារីស ដោយបណ្តាលឲ្យភរិយា និងកូនរបស់គាត់រងរបួស ហើយត្រូវបានគេចាត់ទុកថាជា “ការប៉ុនប៉ងធ្វើឃាត” កាលពីថ្ងៃអាទិត្យ។
ការវាយប្រហារនៅគេហដ្ឋានរបស់លោក Vincent Jeanbrun ក្នុងទីក្រុង L’Hay-les-Roses បានកើតឡើង ខណៈមនុស្សជាងជិត ៣,០០០ នាក់ត្រូវបានចាប់ខ្លួនក្នុងប្រទេសបារាំង បន្ទាប់ពីកុបកម្មរីករាលដាល ។
ពាក់ព័ន្ធនឹងបញ្ហានេះ លោក Vincent Jeanbrun បានសរសេរនៅលើ Twitter ថា ក្រុមបាតុករ បានបើកឡានចូលទៅក្នុងផ្ទះរបស់គាត់ ហើយដុតបំផ្លាញសម្ភារៈមួយចំនួន អំឡុងពេលដែលគ្រួសាររបស់គាត់កំពុងគេងលក់ ខណៈក្រោយការវាយប្រហារនេះដែរ លោកបានប្តេជ្ញាថា នឹងមិនរាថយឡើយ ហើយតាំងចិត្តការពារសាធារណជនឲ្យអស់ពីកម្លាំងកាយចិត្ត ។ ស្របពេលជាមួយគ្នានោះ រដ្ឋអាជ្ញាប្រចាំតំបន់ ក៏បានបើកការស៊ើបអង្កេតលើករណីប៉ុនប៉ងមនុស្សឃាតនេះផងដែរ ខណៈការស៊ើបអង្កេតបឋមបង្ហាញថា រថយន្តនេះមានបំណងបំផ្ទុះផ្ទះនោះចោលតែម្តង ។
គួរបញ្ជាក់ថា កុបកម្មបានឈានដល់យប់ទី ៥ ហើយ ចាប់តាំងពីយុវជន Nahel Merzouk អាយុ១៧ឆ្នាំ ត្រូវប៉ូលិសបាញ់សម្លាប់ ដោយសារតែការចោទប្រកាន់មិនគោរពច្បាប់ចរាចរណ៍។
