អេហ្ស៊ីប៖ អគារផ្ទះល្វែងកម្ពស់ ០៥ជាន់ បានដួលរលំ បណ្តាលឱ្យមនុស្សស្លាប់យ៉ាងហោចណាស់១២ នាក់ ខណៈក្រុមអ្នកជួយសង្គ្រោះបន្តស្វែងរកអ្នកបាត់ខ្លួនពីរនាក់ក្នុងគំនរបាក់បែក កាលពីថ្ងៃចន្ទ ក្នុងរដ្ឋធានីគែរ ប្រទេសអេហ្ស៊ី។ ការដួលរលំអគារគឺជារឿងធម្មតានៅក្នុងប្រទេសអេហ្ស៊ីប កន្លែងដែលសំណង់គ្មានគុណភាពនិងកង្វះការថែទាំរីកដុះដាលដូចផ្សិតនៅតាមទីប្រជុំជន សង្កាត់ និង តំបន់ជនបទក្រីក្រ។
ប្រភពពីសារព័ត៌មានរដ្ឋ MENA បាននិយាយថា ក្រុមជួយសង្គ្រោះបានទាញសាកសពចេញពីគំនរបាក់បែក ហើយបានបញ្ជូនអ្នករស់រានមានជីវិតចំនួនបួននាក់ទៅកាន់មន្ទីរពេទ្យ បន្ទាប់ពីការដួលរលំនៅក្នុងសង្កាត់ហាដេក អែលគូបបា (Hadaeq el-Qubbah) នៃទីក្រុងគែរ ដែលមានចម្ងាយប្រហែល ៣,២ គីឡូម៉ែត្រពីកណ្តាលទីក្រុង។
អភិបាលរងក្រុងគែរ លោក ហូសសាម ហ្វាវហ្ស៊ី (Hossam Fawzi) បាននិយាយថា មនុស្ស ១២ នាក់ត្រូវបានសម្លាប់ ហើយថាកិច្ចខិតខំប្រឹងប្រែងនៅតែបន្តដើម្បីស្វែងរកមនុស្សពីរនាក់ដែលបាត់ខ្លួន។
បន្ទាប់ពីការស៊ើបអង្កេតបឋម រដ្ឋអាជ្ញាសាធារណៈរបស់អេហ្ស៊ីបបាននិយាយថា ការដួលរលំទំនងជាបណ្តាលមកពីអ្នករស់នៅជាន់ផ្ទាល់ដីម្នាក់ ដែលបានរុះរើជញ្ជាំងមួយចំនួនក្នុងអំឡុងការងារថែទាំ។ រដ្ឋអាជ្ញានិយាយថា បុរសអ្នកស្រុកម្នាក់នោះត្រូវបានចាប់ខ្លួននិងកំពុងសាកសួរ។
ក្រសួងសាមគ្គីភាពសង្គមរបស់អេហ្ស៊ីបបាននិយាយថា ខ្លួននឹងផ្តល់ប្រាក់ចំនួន ៦០.០០០ ផោនអេហ្ស៊ីប (១.៩៤០ ដុល្លារ) ដល់គ្រួសារនៃជនរងគ្រោះប្រាំបួននាក់។ ក្រសួងក៏បាននិយាយដែរថា ខ្លួននឹងផ្តល់ជំនួយដល់អ្នករបួសនិងកំពុងតាមដានការខូចខាតទ្រព្យសម្បត្តិនៅក្បែរនោះ៕
