អគ្គិភ័យលើនាវាដឹកទំនិញដែលដឹករថយន្តរាប់ពាន់គ្រឿងនៅឯនាយឆ្នេរហូឡង់ បានថមយថកម្លាំងរនៅពេលអគ្គិភ័យនេះបង្កការព្រួយបារម្ភអំពីការខូចខាតទីតាំងធម្មជាតិក្បែរខាង។
គេសង្ស័យថា រថយន្តអគ្គិសនីណាមួយអាចបង្កផ្កាភ្លើងបង្កើតជាអគ្គិភ័យនេះ ហើយពួកមន្ត្រីកាលពីថ្ងៃសុក្របាននិយាយថាមានរថយន្តជិត៤.០០០គ្រឿងនៅលើនាវាកើតហេតុ គឺច្រើនជាងរបាយការណ៍កាលពីមុន។ អគ្គិភ័យបានកើតឡើងនៅលើនាវាហ្វ្រីមែនថល ហាយវ៉េ(Fremantle Highway )កាលពីយប់ថ្ងៃអង្គារដោយសម្លាប់សមាជិកនាវិកម្នាក់ និងនាំអោយមានកិច្ចខិតខំពន្លត់ភ្លើងនេះដ៏ធំ។ កងឆ្មាំសមុទ្របាននិយាយថា ភ្លើងនៅតែឆេះបង្កផ្សែងខ្មួលខ្មាញ់ តែមើលទៅដូចជាថមថយបើធៀបនឹងមួយថ្ងៃមុន។
ក្រុមហ៊ុនដឹកជញ្ជូនK Lineដែលមានមូលដ្ឋាននៅជប៉ុន បានរាយការណ៍ថា មានរថយន្ត៣.៧៨៣គ្រឿងនៅក្នុងនាវានៅពេលវាឆេះ គឺច្រើនជាងរបាយការណ៍ដំបូងដែលថាជិត៣.០០០គ្រឿង។ រថយន្តទាំងនោះជារថយន្តថ្មីទាំងអស់ មិនមានរថយន្តមួយទឹកទេនិងរួមមានរថយន្តអគ្គិសនី៤៩៨គ្រឿង។
ក្នុងពេលជាមួយគ្នា ម្ចាស់នាវាបាននិយាយថា រថយន្តអគ្គិសនីមានឳកាសខ្ពស់ក្នុងការបង្កអគ្គិភ័យ តែគេត្រូវធ្វើការស៊ើបអង្កេតរកមូលហេតុ។
មនុស្សម្នាក់បានស្លាប់ ក្រោយជនរងគ្រោះរួមទាំងសមាជិកនាវិកចំនួន ២២នាក់ទៀត ដែលសុទ្ធតែជាជនជាតិឥណ្ឌា ត្រូវបានសង្គ្រោះចេញពីនាវាដែលកំពុងឆេះ។ សមាជិកនាវិកមួយចំនួនបានបង្ខំចិត្តលោតចូលក្នុងទឹកសមុទ្រមុនត្រូវបានជួយសង្រ្គោះ៕
