ភ្នំពេញ៖ មន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ បានធ្វើសន្និសីទសារព័ត៌មាន បង្ហាញអំពីប្រតិបត្តិការ និងការបង្ក្រាបឧក្រិដ្ឋជនដែលចាប់ខ្លួនបាន ពាក់ព័ន្ធករណីរំដោះអ្នកទោសដែលជាមេក្លោងគ្រឿងញៀន នៅខេត្តសៀមរាប នៅព្រឹកថ្ងៃទី២៣ ខែសីហា ឆ្នាំ២០២៣។
ប្រតិបត្តិការនេះ ធ្វើឡើងក្រោមការបញ្ជាផ្ទាល់ពី នាយឧត្តមសេនីយ៍ នេត សាវឿន ដោយកម្លាំងជំនាញមន្ទីរប្រឆាំងបទល្មើសគ្រឿងញៀន សហការជាមួយនាយកដ្ឋាននគរបាលព្រហ្មទណ្ឌ, នាយកដ្ឋានកណ្តាលសន្តិសុខផ្ទៃក្នុង និងអង្គភាពជំនាញផ្សេងទៀត រួមដៃគ្នាយ៉ាងស្អិតរមួត ដើម្បីឈានដល់ការចាប់ខ្លួនឧក្រិដ្ឋជន ដែលពាក់ព័ន្ធករណីនេះ។ សរុបតុល្យការចុងក្រោយនេះ ឧក្រិដ្ឋជនចំនួន ១១នាក់ ហើយ រួមទាំងអ្នកទោសដែលត្រូវរំដោះនោះផង ក៏ត្រូវបានចាប់ខ្លួនត្រឡប់មកវិញហេីយដែរ។
សូមរំឭកថា ខ្មាន់កាំភ្លើងមួយក្រុមមានគ្នាប្រមាណ ៥នាក់ ប្រដាប់ដោយអាវុធគ្រប់ដៃ និងមានកាណុង បានសម្រុកចូលរំដោះអ្នកទោសជនជាតិចិនតៃវ៉ាន់ម្នាក់ ដែលមន្ដ្រីពន្ធនាគារបញ្ជូនទៅពេទ្យធ្មេញមួយកន្លែងនៅខេត្តសៀមរាប។ ករណីនេះ បានបង្កឲ្យមានការភ្ញាក់ផ្អើល នៅព្រឹកថ្ងៃទី១៧ ខែសីហា ឆ្នាំ២០២៣៕
