ឥណ្ឌា៖ ស្ពានផ្លូវដែកដែលកំពុងសាងសង់នៅក្នុងប្រទេសឥណ្ឌា បានបាក់កាលពីថ្ងៃពុធ ទី២៣ សីហា ដោយសម្លាប់កម្មករយ៉ាងហោចណាស់ ២៦នាក់ និងរបួស០២នាក់ ពេលនេះអាជ្ញាធរផ្លូវដែក ដែលគ្រប់គ្រងដោយរដ្ឋ កំពុងបើកការស៊ើបអង្កេត។
ឧបទ្ទវហេតុនេះបានកើតឡើងនៅក្នុងទីប្រជុំជនសៃរ៉ាង (Sairang) ក្នុងរដ្ឋមីហ្សូរ៉ាម (Mizoram) ភាគឦសាន នេះបើយោងតាមអភិបាលរដ្ឋ លោក ហ្សូរ៉ាមថានហ្គា (Zoramthanga) និយាយនៅលើវេទិកាផ្ញើសារ X ដែលពីមុនគេស្គាល់ថា Twitter ។ ប្រព័ន្ធផ្សព្វផ្សាយបានរាយការណ៍ថាមានកម្មកររហូតដល់ ៤០ នាក់នៅឯការដ្ឋាននៅពេលស្ពានបាក់ ប៉ុន្តែប៉ូលិសបាននិយាយថា កម្មករ ២៨ នាក់មានវត្តមាននៅទីនោះ។
មន្ត្រីប៉ូលិសម្នាក់បាននិយាយថា “ក្រុមអ្នកជួយសង្គ្រោះអាចទាញយកសាកសពបាន ១៣ នាក់ហើយរហូតមកទល់ពេលនេះ។ កិច្ចខិតខំប្រឹងប្រែងកំពុងបន្តដើម្បីទាញយកសាកសពដែលនៅសេសសល់”។
អយស្ម័យយានភាគឦសាន (NFR) បាននិយាយនៅក្នុងសេចក្តីថ្លែងការណ៍មួយនៅលើ X ថា ឧបទ្ទវហេតុនេះបានកើតឡើងអំឡុងការងារលើគម្រោងផ្លូវដែកថ្មីប៊ែរប៊ី-សៃរ៉ាង (Bhairbi-Sairang)។
NRF បាននិយាយនៅលើវេបសាយរបស់ខ្លួនថា គម្រោងនេះនឹងភ្ជាប់រដ្ឋមីហ្សូរ៉ាមទៅកាន់ផ្នែកផ្សេងទៀតនៃប្រទេស ដោយជំរុញ “ទេសចរណ៍និងការអភិវឌ្ឍសេដ្ឋកិច្ចសង្គម”។”គណៈកម្មាធិការស៊ើបអង្កេតកម្រិតខ្ពស់” ត្រូវបានបង្កើតឡើងដើម្បីស៊ើបអង្កេត។
នាយករដ្ឋមន្ត្រី ណារិនដ្រា ម៉ូឌី បាននិយាយនៅក្នុងសេចក្តីថ្លែងការណ៍មួយថា “ជំនួយដែលអាចធ្វើបានទាំងអស់” កំពុងត្រូវបានផ្តល់ឱ្យដល់អ្នកដែលរងផលប៉ះពាល់៕
