អាម៉េរិក៖ អតីតប្រធានាធិបតីអាម៉េរិកលោក ដូណាល់ ត្រាំ ត្រូវបានចាប់ខ្លួននៅពន្ធនាគារមួយក្នុងរដ្ឋចចចា( Georgia) កាលពីថ្ងៃព្រហស្បតិ៍ ពីបទចោទប្រកាន់ធ្វើសកម្មភាពទុច្ចរិត និង ផ្សំគំនិតគ្នាដើម្បីបដិសេធចោលលទ្ធផលបោះឆ្នោតប្រធានាធិបតីឆ្នាំ២០២០ នៅក្នុងរដ្ឋភាគខាងត្បូងអាម៉េរិក។
ក្នុងអំឡុងពេលប្រទាញប្រទង់គ្នាមួយរយៈពេលខ្លីប្រហែល៣០នាទី អតីតមេដឹកនាំវ័យ៧៧ឆ្នាំរូបនេះត្រូវបាននាំទៅចុះឈ្មោះនិងថតរូបចំពោះបទចោទប្រកាន់ចំនួន១៣នៅពន្ធនាគារហ្វ៊ុលធឹន ខោនធី(Fulton County)ក្នុងទីក្រុងអាត្លង់តា(Atlanta) នេះបើតាមការិយាល័យតម្រួត។ ក្រោយការនាំខ្លួនទៅថតរូបនិងវាស់កំពស់ លោកត្រាំមានកំពស់១,៩ម៉ែត្រ ទម្ងន់៩៧គីឡូក្រាម និងសក់ពណ៌ទង់ដែង។លោកត្រូវបានដោះលែងអោយនៅក្រៅឃុំក្រោយការបង់ប្រាក់ធានាខ្លួន២សែនដុល្លារ។ ចុងចម្លើយដទៃទៀតក្នុងករណីធ្វើសកម្មភាពទុច្ចរិតនេះ បានចូលខ្លួនទៅស្តាប់ការចោទប្រកាន់ចំពោះអាជ្ញាធររដ្ឋចចចាកាលពីប៉ុន្មានថ្ងៃមុននិងក៏ត្រូវបាននាំទៅវាស់កំពស់និងថតរូបរួចហើយដែរ។
មហាសេដ្ឋីរូបនេះត្រូវបានចោទប្រកាន់ពីបទព្រហ្មទណ្ឌបួនលើកចាប់តាំងពីខែមេសា ដោយកត់សំគាល់ឆ្នាំដ៏មានរឿងរ៉ាវប្តឹងផ្តល់ច្រើនបំផុតសំរាប់ត្រាំនៅពេលលោកកំពុងព្យាយាមបង្ហាញមុខនៅតាមតុលាការផង និងធ្វើយុទ្ធនាការដណ្តើមកៅអីសេតវិមានជាថ្មីផង។ ក្នុងការបង្ហោះសារលើបណ្តាញសង្គម Truth Social របស់លោក មុនជិះយន្តហោះទៅកាន់ទីក្រុងអាត្លង់តា លោកត្រាំបាននិយាយថា លោកនឹងត្រូវចាប់ខ្លួនចំពោះ«សេចក្តីក្លាហានហ៊ានប្រឆាំងនឹងការបោះឆ្នោតឆបោកនិងលួចបន្លំមួយ»។ លោកបានបន្ថែមថា«វាជាថ្ងៃសោកសៅមួយទៀតនៅអាម៉េរិក!»។
សូមរំលឹកថា ត្រាំបានអាចគេចមិនថតរូបវាស់កំពស់ក្នុងអំឡុងពេលចាប់ខ្លួនកាលពីពេលមុនក្នុងឆ្នាំនេះនៅរដ្ឋញូវយ៉កចំពោះបទចោទប្រកាន់បង់ប្រាក់បំបិទមាត់តារាអាសអាភាសម្នាក់ នៅរដ្ឋផ្លរីដាចំពោះការរក្សាទុកឯកសារសម្ងាត់រដ្ឋខុស និងនៅរដ្ឋវ៉ាស៊ីនតោនពីបទសមគំនិតបដិសេធចោលលទ្ធផលចាញ់ឆ្នោតឆ្នាំ២០២០។ តែតម្រួតនៅខណ្ឌហ្វ៊ុលធឹន ខោនធី បាននិយាយថាវាជានីតិវិធីស្តង់ដានៅរដ្ឋចចចា ដែលចុងចម្លើយត្រូវតែនាំទៅថតរូបវាស់កំពស់មុនពេលដោះលែងក្រោមការបង់ប្រាក់ធានាខ្លួន។
ការចាប់ខ្លួននេះកើតឡើងមួយថ្ងៃក្រោយពីលោកត្រាំបង្ហាញខ្លួនក្នុងកម្មវិធីជជែកបញ្ចេញមតិតាមទូរទស្សន៍នៅរដ្ឋវីស្កុនស៊ីន( Wisconsin)ដោយលោកអួតអាងថា គូប្រជែងប្រាំបីនាក់ក្នុងគណបក្សសាធារណរដ្ឋសុទ្ធតែមានសម្លេងគាំទ្រនៅពីក្រោយលោកទាំងអស់ក្នុងការស្ទង់មតិ។ត្រាំក៏បាននិយាយថា ក្រសួងយុត្តិធម៌អាម៉េរិកត្រូវរដ្ឋការរបស់លោកបៃដិនប្រើប្រាស់ជាអាវុធដើម្បីបំផ្លាញការប៉ុនប៉ងកាន់តំណែងនៅសេតវិមានរបស់លោក៕
