ឥណ្ឌា៖ អគ្គិភ័យនៅក្នុងទូររថភ្លើងចតនៅស្ងៀមនៅក្នុងស្ថានីយរថភ្លើងមួយនៅឥណ្ឌាខាងត្បូង បានសម្លាប់មនុស្សចំនួន០៩នាក់ កាលពីព្រឹកថ្ងៃសៅរ៍ ។
អគ្គិភ័យបានចាប់ផ្តើមនៅម៉ោង៥ព្រឹក និងឆេះអស់មុនត្រូវបានពន្លត់។ ចំនុចចាប់ផ្តើមនៅក្នុងទូរឯកជននៃរថភ្លើងដែលចតនៅលើផ្លូវក្នុងស្ថានីយ ម៉ាឌូរ៉ាយ(Madurai )ក្នុងរដ្ឋតាមឹល ណាឌូ(Tamil Nadu)។
សេចក្តីថ្លែងការណ៍របស់មន្ត្រីផ្លូវដែកបាននិយាយថា ធុងហ្គាសមួយដែលអ្នកដំណើរលួចដឹកជញ្ជូនបានបង្កឲ្យកើតអគ្គិភ័យ។ សេចក្តីថ្លែងការណ៍មិនបាននិយាយថាតើមានមនុស្សប៉ុន្មាននាក់នៅក្នុងទូកើតហេតុនោះទេ តែថាមនុស្សជាច្រើនបានភៀសខ្លួនរួចចេញពីទូរថភ្លើង។ ពួកមន្ត្រីបានប្រាប់ថា មនុស្ស២០នាក់ទៀតរងរបួសក្នុងហេតុការណ៍នេះ។
គ្រោះថ្នាក់កើតមានជាធម្មតានៅលើផ្លូវដែកឥណ្ឌាដែលមួយថ្ងៃដឹកជញ្ជូនមនុស្សប្រមាណ២២លាននាក់ ហើយការបុកគ្នា ការបើកធ្លាក់ផ្លូវនិងអគ្កិភ័យច្រើនត្រូវបានបន្ទោសលើការថែទាំជួសជុលមិនគ្រប់គ្រាន់ឬកំហុសមនុស្ស។
