នាយករដ្ឋមន្ត្រីថ្មីថៃ នឹងមិនចូលរួមជំនួបកំពូលអាស៊ាននៅឥណ្ឌូនេស៊ីនាសប្តាហ៍នេះទេ ព្រោះលោកស្រេតថា ថាវីស៊ីន និងគណៈរដ្ឋមន្ត្រីរបស់លោកត្រូវធ្វើសច្ចាប្រណិធាននៅចំពោះព្រះភ័ក្ត្រព្រះមហាក្សត្រ មហាវិជ្ជរ៉ាឡុងកន នៅថ្ងៃអង្គារទី៥កញ្ញានិងបន្ទាប់ទៅនឹងថ្លែងសុន្ទរកថាអំពីគោលនយោបាយរបស់រដ្ឋាភិបាលនៅក្នុងសភា នេះបើយោងតាមក្រសួងការបរទេសថៃបានបញ្ជាក់ កាលពីថ្ងៃអាទិត្យ ទី៣កញ្ញា ។ បន្ទាប់ពីនោះទៅគណៈរដ្ឋមន្ត្រីថ្មីរបស់ថៃនឹងចាប់ផ្តើមអនុវត្តភារកិច្ចជាផ្លូវការ។
លេខាអចិន្ត្រៃយ៍លោក សារុន ចារឺនស៊ូវ៉ាន់ នឹងតំណាងថៃនៅកិច្ចប្រជុំអាស៊ាន។
លោកស្រេតថាដែលកាន់តំណែងរដ្ឋមន្ត្រីហិរញ្ញវត្ថុផង បាននិយាយថាគណៈរដ្ឋមន្ត្រីរបស់លោកនឹងធ្វើសច្ចាប្រណិធាននៅចំពោះព្រះភ័ក្ត្រព្រះមហាក្សត្រនៅល្ងាចថ្ងៃអង្គារហើយគណៈរដ្ឋមន្ត្រីថ្មីនឹងបើកកិច្ចប្រជុំពិសេសនៅថ្ងៃពុធដើម្បីត្រៀមសេចក្តីថ្លែងការណ៍គោលនយោបាយរបស់រដ្ឋាភិបាល។
លោកក៏បាននិយាយថាលោកមិនព្រួយបារម្ភអំពីស្ថិរភាពនៃរដ្ឋាភិបាល១១គណបក្សរបស់លោកទេក្រោយលេចឮថាមានសមាជិកគណៈរដ្ឋមន្រ្តីមួយចំនួនបង្ហាញការព្រួយបារម្ភ។
កាលពីថ្ងៃអាទិត្យលោកស្រេតថា និងរដ្ឋមន្ត្រីការពារជាតិដែលទើបតែងតាំងថ្មីលោក ស៊ូធីន គ្លុងសាង( Sutin Klungsang )បានធ្វើជំនួបទទួលទានអាហារការងារជាមួយមេៗទ័ពនៅសណ្ឋាគារមួយក្នុងក្រុងបាងកក។
ប្រភពបក្សភឿថៃបាននិយាយថា លោកស្រេតថាបានអញ្ជើញមេទ័ពកំពូលៗមកណែនាំអោយស្គាល់លោក ស៊ូធីន និងពន្យល់ថាហេតុអ្វីបានជាលោកជ្រើសតាំងលោកជនស៊ីវិម្នាក់មកកាន់មុខតំណែងក្រសួងការពារជាតិ។
លោកស្រេតថា និងស៊ូធីន ក៏ចង់ស្តាប់មតិពីមេទ័ពថ្មី និងពួកលោកក៏ចង់ពន្យល់អំពីគោលនយោបាយសំខាន់ៗរបស់រដ្ឋាភិបាល ក៏ដូចជាចង់សុំកិច្ចសហការដើម្បីអនុវត្តគោលនយោបាយអភិវឌ្ឍជាតិ ក្នុងពេលកងកម្លាំងអនុវត្តភារកិច្ចរក្សាសន្តិសុខផងដែរ៕
