ភ្នំពេញ៖ បុរសម្នាក់ជាមន្ត្រីនគរបាល បានស្រវឹងរួចបើករថយន្តម៉ាកឡិចស៊ីស LX470 រេចង្កូតទៅកៀររថយន្តតូយ៉ូតាព្រុស កំពុងឈប់រង់ចាំភ្លើងស្តុប បណ្ដាលឱ្យរងការខូចខាតតិចតួច បន្ទាប់មករថយន្តបង្កនោះក៏រេចង្កូតទៅបុកជាមួយនឹងដើមត្របែកព្រៃទៀតធ្វើឱ្យរងការខូចខាតរថយន្តបន្ថែមទៀត បង្កឱ្យមានការភ្ញាក់ផ្អើលកាលពីវេលាម៉ោង១១និង៤០នាទីយប់ ថ្ងៃទី៦ ខែកញ្ញា ឆ្នាំ២០២៣ នៅចំណុចភ្លើងស្តុប ផ្លូវ៣១០ កែងផ្លូវព្រះមុនីវង្ស ស្ថិតក្នុងសង្កាត់បឹងកេងកងទី២ ខណ្ឌបឹងកេងកង រាជធានីភ្នំពេញ ។
តាមប្រភពព័ត៌មានបានឱ្យដឹងថា មុនពេលកើតហេតុ គេបានឃើញបុរសវ័យជាង៥០ឆ្នាំម្នាក់ ដែលត្រូវគេស្គាល់ថាគឺមន្ត្រីនគរបាលពាក់សក្តិ៤កន្លះ បានបើករថយន្តម៉ាកឡិចស៊ីស LX 470 ពណ៌ស្ករ ធ្វើដំណើរតាមបណ្តោយផ្លូវព្រះមុនីវង្ស ទិសដៅពីត្បូងទៅជើង ក្នុងស្ថានភាពស្រវឹង។ លុះមកដល់ចំណុចកើតហេតុ ក៏ស្រាប់តែរថយន្តរេចង្កូតជ្រុលទៅកៀររថយន្តម៉ាកតូយ៉ូតាព្រុស ស៊េរីឆ្នាំ២០១០ ពណ៌ស ពាក់ស្លាកលេខ ភ្នំពេញ2BR 5276 ដែលឈប់រង់ចាំភ្លើងស្តុប ក្នុងទិសដៅស្របគ្នា បណ្តាលឲ្យរថយន្តតូយ៉ូតាព្រុសរងការខូចខាតកូដថ្នាំថ្ពាល់មុខចំហៀងខាងស្តាំបន្តិច តែមិនមានគ្រោះថ្នាក់ដល់មនុស្សនោះទេ។
ប្រភពដដែលបន្តថា ដោយឡែករថយន្តឡិចស៊ីសវិញ នៅពេលដែលបើកកៀររថយន្តតូយ៉ូតាព្រុសហើយ រថយន្តក៏រេចង្កូតទៅខាងឆ្វេងបញ្ច្រាសទិសដៅចរាចរណ៍ ហើយជ្រុលទៅបុកផ្ទប់ជាមួយនឹងដើមត្របែកព្រៃទៀត បណ្តាលឲ្យរថយន្តរងការខូចខាតផែ្នកខាងមុខតិចតួច បន្ទាប់មកបុរសជាអ្នកបើករថយន្តក៏បានដេកលក់ក្នុងរថយន្តតែម្ដង ។ មួយសន្ទុះក្រោយមក កម្លាំងសមត្ថកិច្ចចរាចរណ៍ខណ្ឌបឹងកេងកង បានចុះទៅដល់កន្លែងកើតហេតុ រួចធ្វើការគោះទ្វារដើម្បីហៅទើបអ្នកបើករថយន្តដឹងខ្លួនទាំងអាការៈស្រវឹងផងដែរ ។
ក្រោយពេលកើតហេតុ ដោយពិនិត្យឃើញថាសមត្ថកិច្ចក៏សម្រេចអោយម្ចាស់រថយន្តបន្តដំណើរទៅផ្ទះវិញ ដោយមានកម្លាំងសមត្ថកិច្ចជួយជូនទៅទៀតផង ៕
ពាក់ព័ន្ធក្នុងករណីខាងលើនេះដែរ កម្លាំងសមត្ថកិច្ចក៏បានអោយតំណាងរថយន្ដតូយូតាព្រុសធ្វើការចរចាគ្នាជាមួយខាងរថយន្តឡិចស៊ីស ដោយឱ្យជួយចេញថ្លៃការជួសជុល ដើម្បីបញ្ចប់រឿងនៅនឹងកន្លែងកើតហេតុ។
