កំពង់ស្ពឺ៖ លោក ញ៉ាញ់ ជាបហ៊ង ប្រធានមន្ទីរធនធានទឹកខេត្តកំពង់ស្ពឺ បានសម្រេចចុះទៅបញ្ឈប់ការដ្ឋានមួយកន្លែង ស្ថិតនៅក្នុងភូមិវល្លិ៍ប្រេង ឃុំកាហែង ស្រុកសំរោងទង ខេត្តកំពង់ស្ពឺ ក្រោយរកឃើញថាបានចាក់ថ្មចូលប្រឡាយមេពីខាងលើស្ទឹងព្រែកត្នោត ដោយមិនមានច្បាប់អនុញ្ញាត នៅថ្ងៃទី១២ ខែកញ្ញា ឆ្នាំ២០២៣។
លោក ញ៉ាញ់ ជាបហ៊ង បានឱ្យដឹងថា ប្រជាពលរដ្ឋបានរាយការណ៍មកមន្ទីរជំនាញពាក់ព័ន្ធនឹងក្រុមឈ្មួញបាននាំគ្នាដឹកថ្មចាក់ចូលប្រឡាយមេផ្នែកខាងលើនៃស្ទឹងព្រែកត្នោត ធ្វើឱ្យប៉ះពាល់ដល់ដីរបស់រដ្ឋ។ ក្រោយរាយការណ៍នេះលោកនិងមន្ត្រីជំនាញរួមជាមួយអាជ្ញាធរមូលដ្ឋាន ស្រុក-ខេត្ត ក៏បានចុះទៅដល់ទីតាំងជាក់ស្តែង ហើយពិនិត្យឃើញថាបានចាក់ថ្មចូលទៅក្នុងប្រឡាយមេធ្វើឱ្យប៉ះពាល់យ៉ាងធ្ងន់ធ្ងរដល់ចរន្តទឹកហូរ។
ជំហានដំបូង លោក ញ៉ាញ់ ជាបហ៊ង បានណែនាំដល់បុគ្គលិកកម្មករការដ្ឋានឱ្យបញ្ឈប់ជាបន្ទាន់នូវរាលសកម្មភាពដែលបាននិងកំពុងរំលោភបំពានដល់ដីរដ្ឋ ហើយបើនៅតែមិនស្តាប់តាមការណែនាំនេះនឹងត្រូវទទួលទោសទណ្ឌតាមផ្លូវច្បាប់។
ប្រជាពលរដ្ឋដែលរស់នៅក្បែរការដ្ឋាននោះ លោក ជុំ រដ្ឋា បានសម្តែងការសាទរចំពោះចំណាត់ការដ៏មានប្រសិទ្ធិរបស់អាជ្ញាធរខេត្ត និងមន្ទីរពាក់ពន្ធ័លើករណីនេះ។ លោកថាប្រជាពលរដ្ឋនឹងអាចប្រឈមដល់ការលិចលង់ភូមិឋានដោយទឹកជំនន់ ប្រសិនជាការចាក់លុបប្រឡាយមេនេះបានសម្រេច ពិសេសជំនន់ទឹកភ្លៀងនៅរដូវវស្សា៕
អត្ថបទ៖ ប៊ុត សារុន
