អូវីដ្យូ ហ្គូសម៉ាន់ (Ovidio Guzman) ស្តេចត្រាញ់ថ្នាំញៀនម៉ិកស៊ិច ដែលកំពុងជាប់ឃុំនៅក្នុងស្រុក និងជាកូនប្រុសរបស់អតីតស្តេចថ្នាំញៀន ហ្សូអាគីន «អែល ឆាប៉ូ»ហ្គូសម៉ាន់ ( Joaquin “El Chapo” Guzman) ត្រូវបានធ្វើបត្យាប័នទៅកាន់សហរដ្ឋអាម៉េរិក កន្លែងដែលជននេះត្រូវគេតាមចាប់ខ្លួនមកកាត់ទោសចំពោះការជួញដូរថ្នាំញៀនហ្វង់តានីល( fentanyl ) នេះបើតាមអាជ្ញាធរម៉ិកស៊ិចនិងអាម៉េរិកបានបញ្ចេញអោយដឹងកាលពីថ្ងៃសុក្រកន្លងទៅ។
រដ្ឋអាជ្ញា មឺរិក ហ្កាលែន ( Merrick Garland) បាននិយាយថា «អូវីដ្យូ ត្រូវបានបញ្ជូនខ្លួនមកហើយ។ ខ្ញុំអរគុណសមភាគីនៃរដ្ឋាភិបាលម៉ិកស៊ិចចំពោះបត្យាប័ននេះ។ ក្រសួងយុត្តិធម៌នឹងបន្តនាំអ្នកទទួលខុសត្រូវចំពោះការបង្កភាពវឹកវរថ្នាំញៀនក្នុងសហគមន៍អាម៉េរិកមកកាត់ទោស»។
អូវីដ្យូ ហ្គូសម៉ាន់ (Ovidio Guzman) ដែលជាអ្នកស្នងមរតកចក្រភពថ្នាំញៀនពីឪពុក ត្រូវបានចាប់ខ្លួនបានមួយរយៈពេលខ្លីនៅទីក្រុងឃូលីយ៉ាខាន់( Culiacan )កាលពីឆ្នាំ២០១៩ តែត្រូវបានដោះលែងវិញតាមបញ្ជារបស់ប្រធានាធិបតីម៉ិកស៊ិចគ្រានោះ ដើម្បីជៀសវាងការបង្ហូរឈាមជាមួយសមាជិកក្រុមថ្នាំញៀនរបស់គាត់។ គាត់ត្រូវបានចាប់ខ្លួនឡើងវិញកាលពីខែមករា ក្រោយមានការប្រយុទ្ធគ្នាយ៉ាងខ្លាំងនៅក្នុងរដ្ឋ ស៊ីណាឡូអា(Sinaloa)ភាគខាងជើងម៉ិកស៊ិច។
រដ្ឋាភិបាលអាម៉េរិកបានសុំធ្វើបត្យាប័នអូវីដ្យូ ហ្គូសម៉ាន់ កាលពីខែកុម្ភៈ ដើម្បីប្រឈមការចោទប្រកាន់ថ្នាំញៀននៅក្នុងតុលាការអាម៉េរិក។
ឪពុករបស់គាត់ឈ្មោះហ្សូអាគីន «អែល ឆាប៉ូ» ហ្គូសម៉ាន់ ក៏ត្រូវធ្វើបត្យាប័នបញ្ជូនខ្លួនទៅអាម៉េរិកនៅឆ្នាំ២០១៧ ក្រោយរត់គេចចេញពីគុកម៉ិកស៊ិចពីរលើក។ ជននេះឥឡូវកំពុងស្ថិតក្នុងគុកអាម៉េរិកដែលសន្តិសុខខ្ពស់បំផុតនៅក្នុងរដ្ឋខូរ៉ូឡាដូ៕
យោងតាមឯកសារអាម៉េរិក ហ្គូសម៉ាន់និងបងប្អូនរបស់គាត់បានគ្រប់គ្រងប្រតិបត្តិការថ្នាំញៀនអន្តរជាតិដ៏ធំ និងរកចំណូលបានរាប់រយលានដុល្លារ តាមរយៈបង្ហូរថ្នាំញៀនចូលអាម៉េរិក។
