ឥណ្ឌូណេស៊ី៖ រកឃើញនាវាមុជទឹកKRI Nanggala 402 ដែលបាត់ខ្លួនតាំងពីថ្ងៃពុធ នៅក្នុងបាតសមុទ្របាលី ជម្រៅ៨៥០ម៉ែត្រ។ នាវិកទាំង៥៣រូបបានបាត់បង់ជីវិតទាំងអស់។ យោងតាមប្រភពព៍ត៍មានCNA ចុះផ្សាយថ្ងៃទី២៥ ខែមេសា ឆ្នាំ២០២១ បានឱ្យដឹងថា៖ យោធាជើងទឹកឥណ្ឌូណេស៊ីបានប្រកាសថា នាវាមុជទឹកKRI Nanggala 402 ដែលបាត់ខ្លួនតាំងពីថ្ងៃពុធ បានរកឃេីញនៅក្នុងបាតសមុទ្របាលី ជម្រៅ៨៥០ម៉ែត្រ។ ហើយនាវិកទាំង៥៣រូបបានបាត់បង់ជីវិតទាំងអស់ នេះបើតាមការជូនដំណឹងរបស់អាជ្ញាធរឥណ្ឌូណេស៊ី។
នាវាមុជទឹកសង្គ្រោះរបស់សិង្ហបុរីបានរកឃេីញ នាវាមុជទឹកKRI Nanggala 402 បានបាក់ជាបីកំណាត់ លិចក្នុងបាតសមុទ្រជម្រៅ៨៥០ម៉ែត្រ នៅព្រឹកថ្ងៃអាទិត្យទី ២៥មេសា នេះជាការលម្អិតរបស់លោកអគ្គមេបញ្ជាការកងទ័ពជើងទឹក Yodo Margono។ កាលពីថ្ងៃសៅរ៍ម្សិលមិញ ក្រុមសង្គ្រោះបានរកឃើញវត្ថុជាច្រើនរបស់នាវាអណ្តែតលើផ្ទៃទឹក តែពុំទាន់អាចកំណត់បានថាតើនាវាលិចនៅទីណាឱ្យប្រាកដ ដោយឡែកមុនការប្រកាសរកឃើញនាវាមុជទឹកបន្តិច ក្រុមអ្នកស្វែងរករើសបានបំណែកនាវាជាច្រើនផ្សេងទៀត ដូចជា ដងយុថ្កានិងសម្លៀកបំពាក់សុវត្ថិភាពរបស់ក្រុមនាវិក។
អាជ្ញាធរឥណ្ឌូណេស៊ី នៅតែមិនផ្តល់មូលហេតុផ្លូវការនៃការលិចនាវាមុជទឹកនេះទេ តែបានបង្ហើបថានាវានេះទំនងជាមានបញ្ហាអគ្គីសនី ហើយក្រុមនាវិកមិនអាចបញ្ជាឱ្យនាវាអណ្តែតឡើងមកលើផ្ទៃទឹកវិញបាន។ អាជ្ញាធរឥណ្ឌូណេស៊ីបានពន្យល់កាលពីថ្ងៃសៅរ៍ម្សិលមិញថា នាវាទំនងជាត្រូវបែកលិច ដោយកម្លាំងសម្ពាធទឹក ក្នុងជម្រៅដល់៨០០ម៉ែត្រ ដែលហួសពីសមត្ថភាពរបស់នាវា ដោយច្រានចោលសម្មិតកម្មដែលថានាវាមុជទឹកបានផ្ទុះ។
បើតាមអ្នកជំនាញបារាំង នាវាមុជទឹកដែលមានសំបកធ្វើពីដែកថែប ដូចយ៉ាងនាវាគ្រីណង់ហ្កាឡា នឹងប្រេះបែកឡើងសំប៉ែតដូចអាក័រដេអុង យ៉ាងដូច្នោះ នៅពេលមុជទឹកជ្រៅហួសសមត្ថភាព។ នាវាមុជទឹកឥណ្ឌូណេស៊ី KRI Nanggala 402 ចំណាស់៤៤ឆ្នាំ ផលិតដោយអាល្លឺម៉ង់ បានទទួលការអនុញ្ញាតឱ្យមុជចូលក្នុងសមុទ្រនាព្រឹកថ្ងៃពុធទី ២១មេសា ក្នុងក្របខ័ណ្ឌនៃការធ្វើសមយុទ្ធ មានបំពាក់អាវុធបាញ់ដោយស្វ័យប្រវត្តិនិងអាចមុជក្នុងទឹកជម្រៅពី៣៥០-ទៅ៤០០ម៉ែត្រ ប៉ុន្តែគ្រាន់តែពន្លិចខ្លួនបានបន្តិច ស្រាប់ដាច់ប្រព័ន្ធទំនាក់ទំនងឈឹង។ ការបាត់នាវាមុជទឹកKRI Nanggala 402 ឥណ្ឌូណេស៊ីបានបញ្ចេញទាហានជាច្រើនរយនាក់ យន្តហោះយោធា និងនាវាសង្គ្រាមជាច្រើនគ្រឿងទៅស្វែងរកនាវាមុជទឹកនេះក្រែងមានអភិនិហារកឃើញនិងសង្គ្រោះជីវិតនាវិកទាំង៥៣បាន នៅមុនព្រឹកថ្ងៃសៅរ៍។
ប្រទេសជិតខាងម៉ាឡេស៊ី សិង្ហបុរី សហរដ្ឋអាមេរិក ឥណ្ឌា ព្រមទាំង អូស្ត្រាលី ក៏បានចូលរួមក្នុងប្រតិបត្តិការស្វែងរកនាវាបាត់ខ្លួន ដោយផ្តុំការស្រាវជ្រាវក្នុងរង្វង់៣០គីឡូម៉ែត្រការ៉េ។ មុនសេចក្តីជូនដំណឹងស្តីអំពីការរកឃើញនាវាមុជទឹកនៅបាតសមុទ្រ លោកប្រធានាធិបតី យូកូ វីដូដូ បានផ្ញើសាររំលែកទុក្ខដល់គ្រួសារក្រុមនាវិក ដោយចាត់ទុកយុទ្ធពលីទាំង៥៣ថាជាកុលបុត្រជាតិដ៏ល្អប្រពៃបំផុតរបស់ជាតិ ជាអ្នកស្នេហាជាតិ ដែលបានការពារបូរណភាពដែនដី។ គួរឱ្យដឹងថាឥណ្ឌូណេស៊ីមាននាវាមុជទឹកសរុបចំនួន៥គ្រឿង ដែល២គ្រឿងមានឈ្មោះ គ្រីណង់ហ្កាឡាជាផលិតផលរបស់អាល្លឺម៉ង់ ចំណែក៣គ្រឿងទៀត ទំនើបជាងជាបច្ចេកវិទ្យារបស់កូរ៉េខាងត្បូង។
