រាជធានីភ្នំពេញ ៖ នៅថ្ងៃទី១៤ ខែឧសភា ឆ្នាំ២០២១ បន្ទាប់ពីទទួលបានព័ត៌មានពីប្រជាពលរដ្ឋភ្លាម និងដោយទទួលបានការសម្របសម្រួលពី លោក តូច ឧត្តម ព្រះរាជអាជ្ញារង នៃអយ្យការអមសាលាដំបូងខេត្តកំពង់ចាម កម្លាំងជំនាញការិយាល័យប្រឆាំងគ្រឿងញៀនខេត្ត រួមជាមួយជំនាញ នៃអធិការដ្ឋាននគរបាលស្រុកកំពង់សៀម ប៉ុស្តិ៍នគរបាលរដ្ឋបាលអំពិលនឹងប៉ុស្តិ៍នគរបាលរដ្ឋបាលរអាង បានបើកកិច្ចប្រតិបត្តិការចុះបង្ក្រាបករណី ជួញដូរ ដោយខុសច្បាប់នូវសារធាតុញៀន ០១ករណី (ដោយប្រើវិធានញុះញុង់) ឃាត់ខ្លួនបានជនសង្ស័យចំនួន ០៥នាក់ ស្ថិតនៅក្នុងមូលដ្ឋាន ស្រុកកំពង់សៀម ខេត្តកំពង់ចាម ។
មន្ត្រីនគរបាលស្រុកកំពង់សៀម បានឲ្យដឹងថា ៖ ១.ឈ្មោះ ស៊ុយ ឡុង ភេទប្រុស អាយុ១៩ឆ្នាំ ជាតិខ្មែរ មុខរបរ កម្មករសំណង់ មានទីលំនៅភូមិត្រពាំងចារ ឃុំក្រឡា ស្រុកកំពង់សៀម ខេត្តកំពង់ចាម ។ ២.ឈ្មោះ អ៊ុង សំបូរ រដ្ឋា ភេទប្រុស អាយុ១៧ឆ្នាំ ជាតិខ្មែរ មុខរបរ កម្មករសំណង់ មានទីលំនៅភូមិត្រពាំងចារ ឃុំក្រឡា ស្រុកកំពង់សៀម ខេត្តកំពង់ចាម ។ ៣.ឈ្មោះ ខេន ដាវិត ភេទប្រុស អាយុ២២ឆ្នាំ ជាតិខ្មែរ មុខរបរ ជាងម៉ាស៊ីនត្រជាក់ មានទីលំនៅភូមិត្រពាំងចារ ឃុំក្រឡា ស្រុកកំពង់សៀម ខេត្តកំពង់ចាម ។ ៤.ឈ្មោះ ហ៊ីង ផានិត ភេទប្រុស អាយុ២២ឆ្នាំ ជាតិខ្មែរ មុខរបរ ជាងផ្សាដែក មានទីលំនៅភូមិអំពិលលើ ឃុំអំពិល ស្រុកកំពង់សៀម ខេត្តកំពង់ចាម ។ ៥.ឈ្មោះ ជិន អន ភេទប្រុស អាយុ ៥៨ឆ្នាំ ជាតិខ្មែរ មុខរបរ លក់ដូរ មានទីលំនៅភូមិអំពិលលើ ឃុំអំពិល ស្រុកកំពង់សៀម ខេត្តកំពង់ចាម ។
ប្រភពដដែលបានបន្តថា ៖ វត្ថុតាងដែលបានធ្វើការដកហូតរួមមាន ម្សៅក្រាមពណ៍សសង្ស័យជាថ្នាំញៀនចំនួន ០៨កញ្ចប់(ធំ០៣កញ្ចប់) ទូរស័ព្ទដៃចំនួន ០៥គ្រឿង ម៉ូតូចំនួន០៥គ្រឿង ឧបករណ៍សេពមួយសម្រាប់ និងប្រាក់ញុះញុង់ចំនួន ៤៥០.០០០៛ ។
បច្ចុប្បន្នជនសង្ស័យ និងវត្ថុតាងត្រូវបានកម្លាំងនគរបាលបញ្ជូនមកកាន់ស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធី ៕
