កំពង់ចាម៖ ជនសង្ស័យប្រុស-ស្រីពាក់ព័ន្ធបទល្មើសគ្រឿងញៀន ចំនួន១៤នាក់ ត្រូវបានកម្លាំងនគរបាលប្រឆាំងគ្រឿងញៀននៃស្នងការដ្ឋាននគរបាលខេត្តកំពង់ចាម សហការជាមួយកម្លាំងចម្រុះស្រាវជ្រាវបង្ក្រាបឃាត់ខ្លួនជាបន្តបន្ទាប់ ។
សមត្ថកិច្ចបានឲ្យដឹងថា នៅថ្ងៃទី១៨-១៩ និង២០ ខែឧសភាឆ្នាំ២០២១ បន្ទាប់ពីទទួលបានព័ត៌មានពីកម្លាំងផ្តល់ព័ត៌មាន លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម និងដោយបានការអនុញ្ញាតពីលោក សាន សុភ: ព្រះរាជអាជ្ញារង នៃអយ្យការអមសាលាដំបូងខេត្តកំពង់ចាម កម្លាំងជំនាញផែនការងារប្រឆាំងគ្រឿងញៀនខេត្តកំពង់ចាម ជាមួយជំនាញចរាចរណ៍ស្រុកកំពង់សៀម ដឹកនាំដោយលោកលោកវរសេនីយ៍ឯក ឯក ប៉ាន់ដន អធិការនគរបាលស្រុកកំពង់សៀម និង ឧត្តមសេនីយ៍ត្រី ជីវ សេងរស់ ស្នងការរង បានប្រើវិធានរដ្ឋបាលចំហឃាត់ខ្លួនជនសង្ស័យបានចំនួន ០៣នាក់(ប្រុស) និងដកហូតវត្ថុតាងរួមមាន : ម្សៅក្រាមពណ៌សសង្ស័យជាថ្នាំញៀនចំនួន ០១កញ្ចប់ធំ ទូរស័ព្ទដៃចំនួន ០៣គ្រឿង និងម៉ូតូចំនួន ០២គ្រឿង ។
បន្ទាប់ពីទទួលបានចម្លើយសារភាពរបស់ជនសង្ស័យទាំង០៣នាក់ខាងលើ សមត្ថកិច្ចបានបន្តសហការជាមួយកម្លាំងជំនាញ នៃមន្ទីរប្រឆាំងគ្រឿងញៀនរាជធានីភ្នំពេញ និងកម្លាំងជំនាញ នៃអធិការដ្ឋាននគរបាលស្រុកពារាំង ខេត្តព្រៃវែង និងជំនាញខេត្តកណ្តាលបានធ្វើការឃាត់ខ្លួនជនសង្ស័យបានចំនួន០៣នាក់ (ស្រី ០១នាក់)បន្ថែមទៀត ។
ជាមួយនឹងការឃាត់ខ្លួន កម្លាំងបានដកហូតវត្ថុតាងរួមមាន ៖ ម្សៅក្រាមពណ៌សសង្ស័យជាថ្នាំញៀនចំនួន ០១កញ្ចប់.ឆ្នាំងសម្រាប់អ៊ុតថងច្រកថ្នាំញៀនចំនួន០១គ្រឿង ទូរស័ព្ទដៃចំនួន ០៣គ្រឿង, ជញ្ជីងអេឡិចត្រូនិចសម្រាប់ថ្លឹងថ្នាំញៀនចំនួន ០១គ្រឿង, សម្ភារ:វេចខ្ចប់ថ្នាំញៀនមួយចំនួនធំ ប្រាក់រៀល១០លានរៀល ប្រាក់ដុល្លា១០០០ដុល្លា លោហៈធាតុពណ៌លឿង ប្រភេទខ្សែកចំនួន០២ខ្សែ ជញៀនចំនួន០១វង់ខ្សែដៃចំនួន០១វង់ រថយន្តចំនួន០១គ្រឿង និងម៉ូតូចំនួន ០១គ្រឿង ។
រហូតមកថ្ងៃទី២០ ខែឧសភា ឆ្នាំ២០២១ ផ្អែកតាមចម្លើយសារភាពរបស់ជនសង្ស័យខាងលើ សមត្ថកិច្ចបានបន្តសហការជាមួយកម្លាំងជំនាញ នៃអធិការដ្ឋាននគរបាលក្រុងសួង ខេត្តត្បូងឃ្មុំ បានបន្តឃាត់ខ្លួនជនសង្ស័យចំនួន ០៨នាក់ទៀត និងដកហូតវត្ថុតាងរួមមាន៖ ម្សៅក្រាមពណ៌សសង្ស័យជាថ្នាំញៀនចំនួន ០៣កញ្ចប់ ទូរស័ព្ទដៃចំនួន ០៧គ្រឿង និងម៉ូតូចំនួន ០១គ្រឿង ។
ករណីខាងលើ កម្លាំងជំនាញបានកសាងសំណុំរឿងបញ្ជូនទៅសាលាដំបូងខេត្ត ដើម្បីអនុវត្តបន្តតាមនីតិវិធី ៕
