ប្រទេស​អេ​ហ្ស៊ី​ប​បានទទួល​វត្ថុធាតុដើម​ជា​លើកដំបូង​ដើម្បី​ផលិត​វ៉ាក់សាំង Sinovac របស់​ចិន

239

​ស្ថានទូត​ចិន​ប្រចាំ​នៅ​អេ​ហ្ស៊ី​ប​បាន​និយាយ​កាលពី​ថ្ងៃអាទិត្យ​ថា ប្រទេស​អេ​ហ្ស៊ី​ប​បានទទួល​វត្ថុធាតុដើម​ជា​លើកដំបូង​ដើម្បី​ផលិត​វ៉ាក់សាំង Sinovac របស់​ចិន​។​

​យោងតាម​សេចក្តីថ្លែងការណ៍​របស់​ស្ថានទូត​ចិន​នោះបាន​ឱ្យដឹងថា ទន្ទឹមនឹង​វត្ថុធាតុដើម​របស់​វ៉ាក់សាំង Sinovac ការដឹកជញ្ជូន​កញ្ចប់​ថ្មី​នៃ​វ៉ាក់សាំង​ជំងឺ​កូ​វីដ​-១៩ Sinopharm របស់​ចិន​ក៏បាន​មកដល់​អាកាសយានដ្ឋាន​អន្តរជាតិ Cairo ផងដែរ​កាលពី​ថ្ងៃ​សុក្រ​។​

​រដ្ឋមន្ត្រីក្រសួង​សុខាភិបាល​អេ​ហ្ស៊ី​ប លោកស្រី Hala Zayed បាន​និយាយ​កាលពី​ថ្ងៃទី ៩ ខែឧសភា​ថា អេ​ហ្ស៊ី​ប​នឹង​ចាប់ផ្តើម​ផលិត​វ៉ាក់សាំង​ជំងឺ​កូ​វីដ​-១៩ Sinovac ក្នុងស្រុក​នៅ​ខែមិថុនា ហើយ​វ៉ាក់សាំង​ចំនួន ២​លាន​ដូ​ស​ដំបូង​នឹងត្រូវ​បាន​ផលិត​នៅ​រោងចក្រ​របស់​ក្រុមហ៊ុន​អេ​ហ្ស៊ី​ប​សម្រាប់​ផលិតផល​ជីវសាស្ត្រ និង​វ៉ាក់សាំង (VACSERA) ។​

​លោកស្រី Zayed បាន​និយាយ​នៅក្នុង​សន្និសីទ​សារព័ត៌មាន​មួយ​នៅឯ​អាកាសយានដ្ឋាន​ថា ផលិតផល​សម្រេច​ក្នុងស្រុក​នឹងត្រូវ​ចែកចាយ​ដល់​មណ្ឌល​វេជ្ជសាស្ត្រ​នៅ​ទូទាំងប្រទេស​អេ​ហ្ស៊ី​ប​ក្នុង​រយៈពេល​ពីរ​ខែ​បន្ទាប់ពី​វា​ត្រូវបាន​វាយតម្លៃ​ដោយ​អាជ្ញាធរ​ឱសថ​អេ​ហ្ស៊ី​ប​។​

​លោកស្រី​បាន​និយាយថា «​ក្រុមហ៊ុន VACSERA នឹង​ផលិត​វ៉ាក់សាំង Sinovac ជាង ៥​លាន​ដូ​ស​ក្នុង​រយៈពេល​ពីរ​ខែ និង ៤០​លាន​ដូ​ស​ក្នុង​រយៈពេល​មួយឆ្នាំ​»​។​ លោកស្រី Zayed បាន​សាទរ​ចំពោះ​ការមកដល់​នៃ​ការដឹកជញ្ជូន​ទំនិញ​កញ្ចប់​ថ្មី​នៃ​វ៉ាក់សាំង Sinopharm និង​វត្ថុធាតុដើម​របស់​វ៉ាក់សាំង Sinovac ដែល​បាន​នាំមក​នូវ​ទំព័រ​ថ្មី​នៃ​ទំនាក់ទំនង​ទ្វេភាគី និង​វិធី​ល្អ​បំផុត​ដើម្បី​អបអរសាទរ​ខួប​លើក​ទី ៦៥ នៃ​ការបង្កើត​ទំនាក់ទំនង​ការទូត​រវាង​ប្រទេស​ទាំងពីរ​។​ លោកស្រី​បាន​សង្កត់ធ្ងន់ថា ប្រទេស​ចិន​បាន​ចូលរួម​វិភាគទាន​យ៉ាងច្រើន​ដល់​ការធ្វើ​ពិពិធ​កម្ម​ប្រភព​វ៉ាក់សាំង​របស់​អេ​ហ្ស៊ី​ប និង​លើកកម្ពស់​ការ​ស្តារឡើងវិញ​នៃ​សេដ្ឋកិច្ច​របស់​ប្រទេស​នេះ​នៅក្នុង​សម័យ​ក្រោយ​ជំងឺ​រាតត្បាត​។​

​រដ្ឋមន្ត្រី​អេ​ហ្ស៊ី​ប​រូប​នោះបាន​និយាយថា បន្ទាប់ពី​បំពេញ​តាម​តម្រូវការ​ផ្ទាល់ខ្លួន​របស់​ប្រទេស​អេ​ហ្ស៊ី​ប​ហើយ វ៉ាក់សាំង​ដែល​ផលិត​នៅក្នុង​ប្រទេស​អេ​ហ្ស៊ី​ប​នេះ​នឹង​ត្រូវបាន​នាំចេញ​ទៅកាន់​ប្រទេស​ដទៃទៀត​នៅ​ម​ជ្ឈឹ​ម​បូព៌ា និង​អាហ្វ្រិក ដើម្បី​ជួយ​ប្រយុទ្ធ​ប្រឆាំងនឹង​ជំងឺ​រាតត្បាត​នេះ​៕ ​ប្រភព People’s Daily

Turbo tech solutions
HQP